Ruth 4
Boaz Ruth meyo
1Mina ituari Boaz dadi bosi taoni di ida venari ameinu reyo. Usika ourena toe erufudo amiye, kaere bi Boaz yaku sena ni vabi reyo, mina baiyo ri Boaz yaku raka niyo, “Nai asini, bae minari ameinu re kumo.” Ye boi nesi ameinu reyo. 2Boaz yaku taoni di tora vene vana ufo moisi niyo, “Minari ameinu regedi.” Makai reyadi. 3Resi usika ourena toe erufudo amiye rofu niyo, “Naomi bi Moab gutu dairi baisi uni dubuini Elimelech di kono tu bi sero redo. 4Nai mokena bi mina ago ni okuda ameinu reyadi ma nai amiye di toratora di nemokori ya yaku voi reyaine. Voi regiya vo nisi bi buni. Idu, ya de voi regiya vo nisi ka na ni oteima resi na diba. Adina amiye yokoi ini vava de idu ya maka, ma usi bi na.”Ma niyo, “Na yaku voi regida.”
5Kamini Boaz yaku niyo, “Mina kono Naomi rofu voi regiya medari bi, Ruth kaere bi Moab rema ma obu niyo ka voi moigiya mini. Makai regiya ri bi mina kono di muyeyo amiye di roka sa ameibigo.”
6Mina usi usika ourena toe erufudo amiye yaku ni kabai resi niyo, “Makai bi nai vava mina rofu moi taga rigida adina makai regida ri, bi nai midamida yaku mina kono de moigedi. Ye, ya yaku voi re. Na bi anua regida.”
7Sena ituari Israel gaganiri bi kono o gugura sero regika bi, sero redo amiye yaku ini yuka ro moisi voi reyo amiye maro. Israel gaganiri kono o gugura sero regika makai resi koina niyadi. a
8Ye mina usika ourena toe erufudo amiye yaku Boaz rofu niyo, “Ya kaya voi re.” Ma ina bi ini yuka ro kutusi maro. ▼ 9Kamini Boaz yaku tora vene ma amiye tau rofu niyo, “Gua vesi neideyadi na yaku Elimelech, Chilion ma Mahlon di ini gugura tau Naomi rofu voi reyaka. 10Ye Ruth, kaere bi Moab rema ma Mahlon di obu ka nai rema niyo. Makai regida ri bi muyei diyadi vene di roka ameibigo ini gugura sa, ye ini roka ini usika ourena di rofu, ma taoniri roka bura rededi bukari de roro nigo. Gua vesi neideyadi.” c
11Resi tora vene ma vene tau taoni di ida venari yaku niyadi, “Rama, una bi vesi neideyafa vene mini.Warika Amiye yaku mina rema kaere yi yavari bogo rofu buni reyaine, Rachel ma Leah kaere bi Israel di mida tau evata reyadi kana. Ya bi Ephrathah ri amiye tora nigiya ma Bethlehem ri ka yi roka ogau nibogo. d 12Warika Amiye yaku mina rema ofi rofu tutubena ya maraine, kaere bi Perez, Tamar ma Judah di mida, di usika ourena kana nigedi.” e
Boaz ma ini tutubena vene
13Ye Boaz yaku Ruth mesi ina sa vareyo.Warika Amiye yaku buni toragade maro ma rivo nisi rumana mida odiyo. 14Kamini rema vene yaku Naomi ni oteimaradi, “Warika Amiye di roka moi odoro nisifa, kaere bi mina medari usika ourena toe erufudo amiye sa ya ferei tavoi de reyo. Ina bi Israel gaganiri ini roka tora niyaine! 15Ina yaku mida odiyo kaere yaku yi vegu moi rua rego ma ugava nigiya ri ya nari rei mona reyaine. Adina yi radini kaere bi ini uka ya mado bi rumana mida viro vara ▼ ya yaku moiyagadu ri ka vo nisi ya rofu bi buni niyagadu.” 16Resi Naomi yaku mina mida moisi ini budari aiyo rofu nari reyo.17Rema vene mironari amededi yaku niyadi, “Naomi bi rumana mida nufa niyo.” Ma ina roka niyadi Obed.
Ye ina bi Jesse di baba, ma Jesse bi David di baba.
18Mina bi Perez di ini vata ni raroda reyadi vene: Perez bi Hezron di baba, 19Hezron bi Ram di baba. Ram bi Amminadab di baba, 20Amminadab bi Nahshon di baba, Nahshon bi Salmon di baba, 21Salmon bi Boaz di baba ma Boaz bi Obed di baba, 22Obed bi Jesse di baba, ma Jesse bi David di ini baba.
New Testament
Copyright information for
KQC